حلقة الهراء المفرغة...The infinite loop of shit

حلقة هراء مفرغة

عذراً....هذه المدونة مكتوبة بالعامية لأنها الأكثر تعبيراً و عشان العربي بتاعي خرة....لولا العربي كنت بقيت السابع على الجمهورية في ثانوية عامة....آه والله

حلقة هراء مفرغة....اللي هي ايه!؟

دلوقتي مثلاً واحد بقاله 4 سنين في الكلية و بينجح كل سنة عادي بس ليه؟؟ بتحب الكلية؟؟ مش متأكد....طب عندك شغف بالدراسة؟؟ معتقدش...طب بتعمل ايه يخليك مبسوط؟؟ مفيش....طب ايه اضافتك للمجتمع و الناس اللي حواليك؟؟....فعلياً مفيش...أنا عالة!!

طب ناوي على إيه؟؟...ربنا يستر إن شاء الله و أتخرَّج و بعديها أظبَّط نفسي و أشتغل....و ناوي تتجوز؟؟ خلي أي راجل يرُد عليك عشان مقبَّحش....و ناوي تعمل فرح؟؟ إن شاء الله....و ناوي تخلِّف؟؟ ....يعني ممكن بعد الجواز بشوية عشان نتفسَّح و ننبسط و كده....و هتربِّي ابنك على إيه؟؟ هربيه يبقى محترم و ناجح....و هسميه حمادة....

و تمر السنين و يكبر حمادة و يخلَّص مدرسة و ينجح في ثانوية عامة و يخش الكلية و يقعد فيها كام 

سنة و بعدين تسأله...

بتحب الكلية؟؟ مش متأكد....طب عندك شغف بال.......

و تدور الدائرة!!

ايه الِّي أنا عايز أوصله؟

المجتمع عايش بنمط و مبيخرجش عنه.....كله بيدور على راحة البال...ياكل و يشرب و يدرس حاجة مالهاش لازمة أو مبيحبهاش عشان يشتغل شغلانة ملهاش لازمة أو مبيحبهاش عشان يجيب فلوس عشان يشتري بيها حاجات مالهاش لازمة عشان يتفشخر بيها على ناس ملهومش لازمة و يتجوز واحدة مش لازم يكون بيحبها المهم انه "يتجوز" و يخلِّف عيل مالوش لازمة عشان يكبر و يعمل نفس الهراء ده....و كل ده عشان يفضل في حدود توقعات المجتمع بكل أجزاؤه

المجتمع اللي بيتوقعلك حاجة و يحطلك قيود عشان "هو كده"...سواق توكتوك و ابنه متشرِّد و بلطجي تيجي انت تقول "ما هو لو ربَّاه مكانش طلع بلطجي"....عشان انت بروح أمك لما شفت الواد ده وهو صغير قلت "ابن سواق التوكتوك....أكيد هيطلع عيل سو ابن مره"...ليه لما شفت ابن أخوك الدكتور مقلتش "ابن اخويا أكيد هيطلع سو ابن مره"....ليه؟؟

آدي ابن أخوك كبر....و درس...و دخل طب...و اتخرَّج بعديها بامتياز...و لا زال بائس عشان مش هو اللي عايز كده...المجتمع هو اللي عايز....المجتمع حاططله قيود عظيمة لدرجة انه ميعرفش انه يائس بسبب ان المجتمع لبِّسه في وظيفة هو مبيحبهاش....اتضحك عليه عشان عبيط و مشي على توقعات المجتمع اللي حواليه و محاولش يكسر القاعدة

الفكرة كلها في الشجاعة

الشجاعة في كسر قيود المجتمع اللي حاططهالك...الشجاعة في المجازفة

المجازفة في إنك تجرَّب...تجرَّب عشان تلاقي اللي انت بتحبه...تلاقي أحسن طريقة تقدر تضيف بيها للمجتمع...

المجتمع هو المذنب 100% إلا في حالة واحدة....انك تبقى جبان و تقرر متجازفش....اتشجع.....جازف

عشان كل شخص مستقل بذاته...مستقل بعقله لازم يكون ليه إضافة مميَّزة و فريدة و نادرة للمجتمع اللي حواليه

الإضافة دي ممكن تكون إنه يبقى مميز في المجال اللي هو بيدرسه أو بيشتغل فيه...ممكن تكون مجرَّد الشغف اللي ظاهر عليه بيلهم الناس انها تعمل زيه....يدوروا على اللي "هما" عايزينه

الإضافة مش لازم تكون مهنية...انت بتجاربك بتدور على الشيء اللي هيخليك "مبسوط" حتى لو مش بيجيب فلوس...حتى لو مش شغل...مبسوط و انت بترسم و الرسم مبيأكلش عيش!؟ ارسم...مبسوط و انت بترقص؟؟ ارقص...مبسوط و انت بتتفلسف؟؟ اتفلسف...بتنبسط لما بتركب عجل؟؟ لف بيها البلد كلها!!

وجودك كفرد سعيد في المجتمع ممكن يكون هو الإضافة...نشر الطاقة الإيجابية اللي جواك و إلهام اللي حواليك هو الإضافة اللي هتساعد ناس تانية توصل للسعادة

اخرج من السجن اللي انت حابس نفسك فيه و اطلع منه على سجن المجتمع و افشخه!!

افشخ قيود المجتمع و افشخ منطقهم و افشخ توقعاتهم!!

افشخ حلقة الهراء المفرغة..............اخرج منها

انت الفشيخ!!