آسف على الهرطقة
قاعد مع نفسي في أمان الله سرحت شوية لقيت نفسي بفكر في المستقبل و
عايز أعمل إيه و نتجت عنها المدونة السابقة بس مرَّة واحدة بطلت تفكير و
قلت...."هو أنا بعمل كل ده ليه؟" و من هنا بدأ التفكير.....
التفكير فيما حرَّم السابقون التفكير
فيه....عدم الأخذ بالمسلمات....التشكيك للتأكيد
في لحظات ضعف مريضة بتعدي عليها و تقول
"هو ربنا عايز مني إيه؟"....تلاقي نفسك مش عارف ترد, "هو خلقني
ليه؟".....مخك ساكت مش لاقي إجابة غير الإجابات التقليدية (عمارة الأرض و
التزكية عن النفس و عبادة ربنا)....طب و بعدين؟؟
أنا اتخضيت لما لقيت نفسي بفكَّر كده و مش
مقتنع بالأسباب....مش مقتنع؟؟ أحيه!! لو مش مقتنع يبقى إيه لازمتها "مسلم"
في البطاقة!؟ ما كنت تسيبها فاضية أحسن!! قلت أكلَّم ناس تانية...
Jسألت ماما....ليه مش عارف بس ماما عندها رد لكل حاجة
أنا: ماما هو إحنا ليه؟
ماما: بتسأل ليه؟
أنا: أصلي مش مقتنع بالأسباب
ماما: ده انت كده بتتطاول على ربنا
أنا: شكراً
اشطبها يابني من الليستا بتاعة الناس اللي
عارفه كل حاجة!!
أخويا الكبير دخل في وسط الحوار (مكنتش
هسأله أكيد) و قال "ممنوع أصلاً نتكلم في المواضيع دي".....لولا إنه
أخويا كنت شتمته بأهله عشان غباؤه
No wonder enno 7ezb kanaba
المهم دي كانت خلاصة رد فعل أهلي.....نيجي
بقى لأحلى أصدقاء سوء شفتهم في حياتي!!
بعض الردود كانت: (بنضيع وقت-السبب مش
واضح-ربنا بيعاقبنا-مش عارف-ربنا عايز كده.......كلام كفرة كتير في النص)
قررت إني أدوَّر لنفسي على سبب....قلت أجيب
الأسباب التقليدية و أفكَّر فيها شوية (الكلام اللي جاي فيه تطاول لأجل الوصول مش
بعمل عرض يعني) نبدأ بقى....
أول سبب (ربنا خلقنا عشان نعبده)....ربنا؟؟
اللي خلق الكون كله؟؟ عايز كائنات طفيلية حقيرة مخربة تعبده؟؟ و كمان نصهم هيخش النار
عشان قرروا ميعبدوهوش!!
في حاجة ناقصة...
مستحيل يكون ده السبب....ربنا مش محتاجني
أعبده خلقني ليه؟؟
بس المنطقي إني أعبد ربنا عشان هو ولي النعم
و هو الخالق و كل اللي أنا هعمله فيه طاعة ده للشكر و طلب الرحمة.....بس هو ليه
حطني في الموقف ده أصلاً؟!
هيستفيد إيه!؟
السبب التاني (عمارة الأرض)...تاني؟؟ ربنا
اللي خلق الكون كله مستني الكائن ده يعمر الأرض؟؟...
مستحيل!! ده ربنا يقدر يعمر الكون كله و
بمؤمنين و في ثانية....ليه أتفشخ أنا!؟
بعدين قلت أدور في قصة الشجرة.....ربنا خلق
آدم و حوا و عايشين في الجنة و ربنا نهاهم عن الشجرة دي....بس أكلوا من الشجرة و
ربنا عاقبهم و نزلهم الأرض....ده منطقي؟؟
يعني ربنا اللي اجتمعت فيه كل صفات الحكمة
هيعاقب سلالة آدم كلها عشان غلطته؟؟
طب عندي مثال آدمي...انت-اسمك حمادة- أبوك
ماشي في السوق و أبوك عدَّى على عربية
طماطم و أخد طمطماية كده و أكلها
الراجل صاحب العربية أخد باله و مسك فيه و
جاب الشرطة و بتاع و قالهم الراجل ده سرق مني طمطماية و أكلها
و انت كل ده قاعد في بيتكوا متعرفش أي حاجة
أبوك راح المحكمة و عمل قضية و مرمي في
القفص و القاضي بيقول الحكم فجأة القاضي قال "حكمت المحكمة حضورياً على
المدعو حمادة و أبوه اللي سرق الطمطماية بالسجن المؤبد مع الأشغال
الشاقة".......
و العساكر جم أخدوك انت من بيتك و انت مش
فاهم حاجة و أخدوا أبوك و رموكوا في السجن
حمادة قال "ايه ده!؟؟ هو أنا عملت
ايه؟؟ أبويا سرق......طب و أنا مالي؟؟ ما تحبسوه.....هو اللي غلط....أنا معملتش
حاجة!!....أنا ليه أتحاسب على غلطة أبويا؟؟"
كام واحد فعلاً أبوه ولا أخوه حرامي و قتال
قتلة و مرمي في السجن و هو عايش حياة طبيعية؟؟
اذا كان البشر وصلوا للتحليل ده....ان محدش
بيتحاسب على جرايم أهلة...أكيد ده مش السبب ان ربنا خلق آدم و سلالته و سابهم
يتعذبوا في الأرض
آه بنتعذب....ما هو لو كان آدم سمع كلام
ربنا كان زمانَّا كلنا عايشين في الجنة.....كان زمانَّا في "يوتوبيا"
يبقى أكيد السبب مش الشجرة
بس الكلام صريح
احنا هنا بسبب الشجرة
بس مش منطقي
و بعدين؟؟
أكيد مش عشان الشجرة...
What if I told you…
مفيش شجرة!!!!!
شفت الصاعقة؟؟ اتكهربت؟؟؟ سبِتلي الدين؟؟
كفَّرتني؟؟ طب برافو
اسمع بقى.....ليه متبقاش الشجرة دي قصة
رمزية؟؟ ليه ميبقاش آدم و حوا نفسهم رمزين عن الذكر و الأنثى؟؟
ليه ميبقاش في احتمالية اننا كلنا غلطنا
غلطة هي اللي خلقت الخير و الشر جوانا؟؟
بعد ما تحملنا أمانة العقل....العقل هو اللي
ودانا في داهية؟؟
العقل هو الحرية....الحرية في
الاختيار.....و احنا اخترنا نبقى هنا؟؟
الغلطة هي العقل و العقل جابنا الأرض
النتيجة::
أنا مش هنا بسبب "ربنا عايز كده, عمارة
الأرض, آدم و حوا أكلوا من الشجرة......"
أنا هنا باختياري...أياً كان اختيارك هو انك
تبقى هنا ولا اختيارك أدَّى لوجودك هنا
العقل ده باختياري
الأخطاء دي باختياري
كله بمشيئة ربنا أولاً و أخيرا بس في الآخر
أنا اللي وصلتني للي أنا فيه
و كل الأسباب التانية جت بعد اختياري
أنا بعبد ربنا عشان ربنا بيحبني, رزقني نعمة
العقل, رزقني الصحة, و فيا من روحه و العبادة حُب
و أكيد جزء من الخوف من السلطة و ان ربنا هو
اللي هيقرر أنا هروح فين في الآخر و برضه كله بناءً على اختياراتي بين الصح و
الغلط
أنا هعمَّر الأرض عشان مش هعرف أعيش من غير
ما أعمَّرها و بما اننا عندنا عقل و العقل فضولي بالتالي طبيعي اننا مفضلناش في
مرحلة الصياد و جامع الثمار و بنتطوَّر مع الزمن
السؤال بقى اللي مالوش إجابة هو قبل ما كلنا
نغلط الغلطة الفادحة اللي جابتنا هنا
ربنا خلقنا ليه من الأساس؟؟ و ده سؤال شخصي
لربنا احنا مالناش اننا نفكَّر في اجابة أصلاً...دي حاجة بتاعة ربنا و الأكيد ان
جزء من السبب ان لم يكن هو ده السبب الوحيد اننا نعبده
و ده شيء طبيعي...يعني لو اختلقت مثال آدمي
واحد جاب حيوان و ربَّاه و أكله و شرَّبه طبيعي أقل حاجة مطلوبة من الحيوان ده هي
انه يحب صاحبه
أنا عارف ان كون اني بختلق أمثلة آدمية
للتعبير عن الموقف في حد ذاته غلط تمثيل ربنا في بني آدم بس دي مجازفة أنا مستعد
أجازفها عشان أوصَّل الفكرة لعقلي الآدمي الطفيلي الحقير.....الغبي
آسف على الهرطقة
